3. Antzerkialdia antolatu dute Aiztondon

2025-03-21

Alkizak ekimenarekin bat egin du lehen aldiz Antzerkialdian eta martxoaren 22an ‘Kutsidazu bidea, Ixabel’ antzezlana hartuko du hiru asteko antzerki egitarauari hasiera emateko

Aiztondoko Antzerkialdiaren hirugarren edizioa ospatuko da martxoaren 22tik apirilaren 12ra. Lehen aldiz bailarako bost herriek elkarlanean antolatu dute egitaraua eta Alkizan, Adunan, Asteasun, Larraulen eta Zizurkilen eskainiko dira emanaldiak.

Euskaraz eta adin guztientzako antolatu dute antzerkian zentratutako programazio zabala eta ipuin kontaketak, magia saioak eta bakarrizketak izango dira besteak beste.

Aurten hamabost antzerki obra ikusteko aukera egongo da Aiztondon hiru astetan zehar. Haurrentzako programazioa izango da zabalena eta, ohikoa den bezala, Otaño eta San Millan ikastetxeetako ikasleek ere beraien antzezlana aurkeztuko dute.

Ekitaldi ia guztietarako sarrera doakoa izango da, aforoa bete arte. Laura Penagosek Zizurkilen eskainiko duen ‘Putaren Bakarrizketa Eroetxean’ bakarrizketarako sarrerak hiru eurotan egongo dira salgai.

Gainera, berrikuntza bezala, ‘Barre Txoootx!’ bakarrizketa egingo da martxoaren 28an Adunako plazan Maria Blanco, Ander Malbadi eta Mirari Martiarena bakarrizketariekin, eta ondoren, afari-merienda egingo dute festarekin jarraitzeko. Norberak eraman beharko du jatekoa eta edalontzia eta udalak jarriko ditu mahaiak eta barrikotea.

Aiztondoko III. Antzerkialdiko egitaraua:

Alkiza

Martxoak 22. ‘Kutsidazu bidea Ixabel’, Berrobiko Txalo Talo taldeak, 19:00 Elizan.

Asteasu

Martxoak 24. ‘Kolorez Kolore’, Pantzart Teatroa, 15:00 Pello Errota eskolan (ikasleentzat soilik).
Martxoak 27. ‘Oxido’, Pez Limbo, 19:00 Udaletxean.
Martxoak 28. ‘Basoa’, Teatro Firulete, 15:00 Pello Errota eskolan (ikaslentzat soilik).

Aduna

Martxoak 28. ‘Barre Txoootx!’ Maria Blanco, Ander Malbadi eta Mirari Martiarena bakarrizketariekin, 19:30 Herriko plazan (ondoren, afari-merienda jatekoa eta edalontziak norberaren kontu; mahaiak eta barrikotea udalaren eskutik.
Apirilak 2.’Munduari itzulia 80 egunetan’ LHko ikasleentzat, Sustrai Teatro, 14:45 Elordi Lokalean.
Apirilak 2. ‘Ipuin Lotsatiak’ HH-ko ikasleentzat, Odei Arregi (Bapatean zirko), 14:45 Liburutegian.

Larraul

Apirilak 3. ‘Haizeak darama eta dakarrena’haurrentzat, Saioa Aizpuruarekin, 17:15 Liburutegian.
Apirilak 4. ‘Betetako promesak’ helduentzat, Ester Poveda, 19:00 Balio anitzeko gelan.
Apirilak 6. ‘Altuna jaunaren asesinatzailea’ helduentzat, Aimara Teatro, 12:00 Balio anitzeko gelan.

Zizurkil

Apirilak 7. ‘Maitatzen’ HH 3, 4 eta 5eko umeentzat, Zirkun-Zirko, 11:00 Atxulondo kultur etxean.
Apirilak 8. ‘Espazioa’LH 1, 2, eta 3ko umeentzat, Eneko Etxebarrieta, 11:00 Atxulondo kultur etxean.
Apirilak 9. ‘Burua Txoriz Beteta LH 4, 5, eta 6ko gaztetxoentzat, Tdiferencia, 11:00 Atxulondo kultur etxean.
Apirilak 10. Zizurkigo Umeen Emanaldia 11:00etan Atxulondo kultur etxean.
Apirilak 12. ‘Putaren Bakarrizketa Eroetxean’ Laura Penagosen eskutik, 19:30 Atxulondo kultur etxean. Sarrerak 3 eurotan.

Erreportajea gustatu bazaizu, jarrai iezaguzu sareetan (X, Facebook eta Instagram) gure edukiez gozatzeko. Gainera, proposamen edo iradokizunen bat helarazi nahi badiguzu, txantxangorri@txantxangorri.info helbidera idatz diezagukezu.