Matematika protagonista berriro urtarrilean, Lemniskatak antolatutako zikloaren 14. edizioan
Lau ekitaldi egingo dira Beasaingo Igartza Jauregian matematika zabaltzeko, urtarrileko ostiraletan 19:00etan
Txantxangorri aldizkaria
Matematika izango da aurten ere protagonista Lemniskata elkarteak antolatutako ‘Urtarrila, matematikaren bila’ zikloaren 14. edizioan. Goierriko zientzia sare herrikoiak bost ekitaldi antolatu ditu urtarrilean zientzia matematikoen dibulgaziorako.
Urtarrilaren 10ean, zikloari hasiera emango diote Raul Ibañez, Marta Macho eta Pedro Alegriaren hitzaldiarekin. Bakoitzak 20 minutu inguruko hitzaldia eskainiko du: ‘Sor al daiteke artelan bat teorema matematiko batetik abiatuta?’ (Raúl Ibáñez); ‘Matemática Poética’ (Marta Macho); ‘Einstein es una baldosa’ (Pedro Alegría).
Hilaren 17an, Larraitz Aranburu matematikan doktoreak zirkuaren matematikari buruzko bere aurkezpenean, oreka ariketak aztertuko ditu (Cuerda floja, Vara, Hula hoop, Arco-puente), Malabareak eta Mortalak, eta, horietan, Media-ertaina, Katenaria, Pitagoras, Grafoak, Serieak, Espiralak edo Aurea arrazoia aurki daitezke.
Urtarrilaren 24an, hainbat ekintza egingo dituzte 19:00etatik aurrera. Oihana Garaialdek ‘Matematikaren zuloak eta zulo matematikoak’ hitzaldia eskainiko du. Teoria edo hasiera matematiko klasikoetatik abiatuta, hitzaldi honen helburua gaur egun zulo horiek kontatzeak eta aplikazio praktikoren batera iristeak izan dezakeen garrantzia erakustea da.
Era berean, Lemniskatako XI. Argazki Matematikoen Lehiaketako sariak banatuko dira eta lehiaketara aurkeztutako irudien aukeraketa batekin inauguratuko da erakusketa.
Zikloa urtarrilaren 31n amaituko da, Maria García Moneraren ‘Paperezko eta guraizezko eskultura geometrikoak’ hitzaldiarekin. Felix Klein matematikaren historiako matematikari garrantzitsuenetako baten lanean oinarrituko da. XIX. mendearen amaieran, paperez eta guraizez soilik egindako eskultura geometrikoen bilduma txiki bat diseinatu zuen. Hitzaldi honetan azalduko du nola, aurrerapen teknologikoak, F. Kleinen teknikarik klasikoenak artearen zerbitzura jartzen dira ordenagailu bidez diseinatutako eskultura geometriko berriak sortzeko.
Txantxangorri aldizkaria etxean jaso nahi baduzu, erreportajeak online argitaratu aurretik, egin zaitez harpidedun hemen.
|
Albistea gustatu bazaizu, jarrai iezaguzu sareetan (X, Facebook eta Instagram) gure edukiez gozatzeko. Gainera, proposamen edo iradokizunen bat helarazi nahi badiguzu, txantxangorri@txantxangorri.info helbidera idatz diezagukezu. |
