Be! asteburua Berastegiko artzantzaren tradizioa balioan jarriko du martxoaren 28tik 30era
Hirugarren urtez Berastegiko artzain kulturaz gozatzeko festa izango da Be!
Herriko artzantza balioan jarri eta bere etorkizunerako hausnarketarako bidea hasteko Be! Artzain Kultura Asteburua antolatu da hirugarrenez Berastegin. Hiru egunez, hitzaldiak, ibilaldiak, tailerrak eta azoka egongo dira herrian, guztia ardien eta artzantza protagonista izanik.
Gastronomiatik haratago, Berastegin ardiak eta artzaintzak izan duen eraginaren eta duen etorkizunaren erakusle izango da ekitaldia. Helburua arkumea balioan jarri eta bere kontsumoaren inguruan hausnartu eta gozatzeko festa izatea da. Bisitariei gozatu eta ikasteko aukera eman nahi zaie formatu berritzaile eta parte hartzailean.
Ostiralean hitzaldia
‘Etorkizuna hausnarrean’ izeneko hitzaldi eta solasaldiarekin hasiko da egitaraua martxoaren 28an, ostiralarekin. Etorkizunera begira jarriko dira aurtengoan herriko artzainak, artisauak zein alor ezberdinetako ikerlariekin.
Besteak beste Kris Meraki artile-artisauak, Iraitz Garaiburu eta Oier Ugartemendia herriko artzain gazteek, Joseba Sanchez ikerlariak, Ane Gartziandia Gomiztegi artzain eskolako kideak eta Aritz Ganboa artzainak parte hartuko dute, hitzaldi sortan. Hitzaldiak irekiak izango dira, eta arratsalde guztian luzatuko dira, 14:30etik 17:30a arte.
Larunbatean ibilaldiak
Egun batez artzain izatearen esperientzia bizitzeko, larunbatean mendi ibilaldia antolatu dute, aurreko urteetan bezala larunbatean, martxoaren 29an. Hala ere, berrikuntza batekin dator oraingoan: plazatik Gorosmendirako bidea egingo dute eta bidean Julen eta Iker artzain gazteak beren artaldearekin elkartuko dira ibilaldira, denak elkarrekin bidearen zati bat egiteko.
Gorosmendin, ardiak itxituran sartu ondoren, adineko bi artzainen eskutik Leitzarango garai bateko artzantzara gerturatuko dituzte parte hartzaileak. Gainera, mondejuak egiteko ikastaroa eskainiko da Urepele elkartean, baita ipuin kontaketa, artile tailerra eta gazta dastaketa-gidatua ere.
Larunbateko ekitaldietan parte hartzeko derrigorrezkoa da aurrez izena ematea, ipuin kontaketan izan ezik. Horretarako, beartzainkultura@gmail.com helbidera mezua bidali beharko da edota 600567730 telefonora deitu.
Igandean artzain ibilbidea
Ohitura den bezala, Artzain kulturaren alderdi guztiak bertatik bertara ezagutzeko eguna izango da igandea. Horretarako, herrian zehar hamar gune ezberdinez osatutako 2,5 kilometroko ibilbidea osatu da, adin guztientako bisitariei egokitutakoa. Goiz guztian Berastegi aire libreko museo bizia bihurtuko da artzantzaren inguruko lan guztiak ezagutzera emateko: ardiak, ardi-lanak, belardiak, tresnak, artzain-txakurrak, gazta…
Era berean, goizean Gazpio Gaztandegira bisita gidatuak antolatu dira. Bi txanda egongo dira, 11:00etan eta 12:30ean. Joan nahi dutenez aurrez izena eman beharko dute beartzainkultura@gmail.com helbidera mezua bidaliz edota 600567730 telefonora deituz.
Bazkarirako azoka gastronomikoa egongo da plazan eta besteak beste arkumea burruntzian, ardi gisatua, mondejuak edota ardi gazta kroketak dastatu ahal izango dira. Jaiari amaiera emateko, erromeria egongo da, 13:30etik 15:00etara.
Txantxangorri aldizkaria etxean jaso nahi baduzu, erreportajeak online argitaratu aurretik, egin zaitez harpidedun hemen.
|
Erreportajea gustatu bazaizu, jarrai iezaguzu sareetan (X, Facebook eta Instagram) gure edukiez gozatzeko. Gainera, proposamen edo iradokizunen bat helarazi nahi badiguzu, txantxangorri@txantxangorri.info helbidera idatz diezagukezu. |
