Erik Jaka: «Buruz Buruko Txapelketan nire mailarik onena eman nahi dut»
Binakako txapelketa uste baino lehenago bukatuta, Erik Jakak jada hurrengo txapelketa dauka buruan
Hamabi urte beteko ditu aurten profesional bezala Erik Jakak. 2013ko ekainean egin zuen debuta eta urte hauetako guztietako balantze positiboa egiten du. Orain, berarentzat Binakako Txapelketa bukatuta, Buruz Burukoan du jarrita begirada, eta herriko haurren pelota irakaslea ere bada.
–10 urtetik gora daramatzazu profesionaletan. Ze balantze egiten duzu?
-Ekainean 12 egingo ditut, 2013n debutatu nuen. Debutatzen dugunean lehenik eta behin pelotan ibiltzen diren gazte guztiek ametsa betetzen dugu, eta gero helburua izaten da, pixkanaka hobetzen joatea. Bigarren mailan debutatu nuen eta nere nolabaiteko helburua zen bigarren maila horretan etapak erretzen joatea, hobetzen segitzea urtez-urte eta noizbait lehenengo mailan jokatzeko aukerak edukitzea. Azkenen, akaso ez beste batzuk bezain azkar, baina bai etapa horiek erretzen joan nintzela eta zorionez urte batzuk badaramazkit lehenengo mailan jokatzen. Nik pertsonalki ez nuen debuta inongo aspiraziorekin egin, baina bai saiatu naizela, eta nire helburua izan dela beti, egunetik egunera eta urtetik urtera pelotari konpletoagoa izatea, pelotari hobea izatea, eta iruditzen zait gaurko egunean hamaika urte bete ditut, hamabi ere beteko ditut profesionaletan eta hori lortu nahi baduzu mejoratzen joatea derrigorrezkoa da.
-Entrenamenduak nolakoak izaten dira?
-Bi entrenamentu mota banatzen ditugu. Batzutan da arlo fisikoa gehiago lantzen da eta bestetan gehiago frontoia. Asteburuan partidu bat badago astean zehar frontoiko bi entrenamendu egitea gustatzen zait. Akaso bat partidu bat simulatuz eta bestea entrenamendu teknikoxeagoa. Beste hiru egunetan alderdi fisikoa landuko nuke gehiago. Prestatzaileak markatzen dit zer lan klase egin behar dudan. Gero asteko egun bat deskansatzea baita garrantzitsua iruditzen zait.
-Zuk gaztetan ere aurrelari bezala jokatzen zenuen?
-Egia esan ez. Jubenilen bigarren urtera arte edo horrela oroitzapena daukat atzelari jokatzen nuela. Baino betidanik gustatu izan zait aurreko jokatzeko era eta, uste det jubeniletan bigarren urtean izan zela, entrenatzaileekin hitz eginda, erabaki genuela posizio aldaketa hori. Iruditzen zait aldaketa onerako izan zela.
-Urte honetarako zein aurreikuspen dituzu?
-Binakakoa ia bukatzera doa. Niretzat nahi baino lehenago bukatu zen play offetako partidu hori galduta. Balantzea, batez ere joku aldetik, positiboa ateratzen det Binakako Txapelketa hortatik. Horko sentsazio onei jarraipena emanez orain partidu batzuk ere jokatzen ari naiz. Segituan Buruz Burukoa hasiko zaigu udako oporraldien aurretik. Aho zapore txarrarekin bukatu nuen lehengo urtean Buruz Buruko Txapelketa eta nahiko nuke txapelketan nire mailarik onena eman eta ahozapore txar hori kendu, behintzat.
-Herriko gaztetxoen entrenatzailea ere bazara
-Bai. Pandemia sartu baino bizpahiru urte lehenago herrian Otsabio Kirol elkartea berpiztu egin zen, nolabait. Herriko gazte batzuk deia jaso genuen, esku bat bota nahi genuen bertan, eta niri iruditzen zitzaidan Iraitz Olaexearekin batera, biok zerbaitetan laguntzea bageneukan, pelotan zela. Biok hor sartu ginen eta hor jarraitzen dugu. Iratzek niretzako alderdi inkomodo edo zailena dena eginez, gestioak, txapelketetako apuntatzeak eta abar, eta nik frontoian astean bitan entrenamenduak emanez.
-Umeak ere kontentu egongo dira.
-Hori beraiei galdetu beharko zaie. Ni saiatzen naiz ahalik eta gustukoen pasa dezaten entrenamenduetan, baina garrantzia handia ematen diot astean zehar nirekin pasatzen dituen bi ordu horiei beraiek ere ikasteko aprobetxatu nahi izatea. Askotan gertatzen da haur batzuk etortzen direla ikasteko gogoz, beste batzuk etortzen dira denbora pasatzeko gogoz, eta nik beti baloratzen dut ondo pasatze hori, dibertsio puntu hori edukitzea baina balore handia ematen diot ikasteko gogoa izateari eta laneako etika puntu bat erakusteari.
Txantxangorri aldizkaria etxean jaso nahi baduzu, erreportajeak online argitaratu aurretik, egin zaitez harpidedun hemen.
|
Erreportajea gustatu bazaizu, jarrai iezaguzu sareetan (X, Facebook eta Instagram) gure edukiez gozatzeko. Gainera, proposamen edo iradokizunen bat helarazi nahi badiguzu, txantxangorri@txantxangorri.info helbidera idatz diezagukezu. |
