Luzean garaile 61. Enrique Abril Errebote Txapelketan
Txost taldearen aurka gailendu zen Oiartzungo plazan jokatutako Enrique Abril Errebote Txapelketako finalean
Txantxangorri aldizkaria
Irailean eta urrian zehar jokatu zen Enrique Abril Errebote Txapelketa Luzean taldeak irabazi du, Txost gipuzkoarren aurka. Urriaren 27an jokatu zen finala Oiartzungo Beheko plazan. Lapurtarrak nagusi izan ziren partidan eta 13-4 emaitzarekin amaitu zen finala.
Mendiola, Thicoipe, Prajs, J. Karrikaburu eta F. Karrikaburu izan ziren Luzean taldeko jokalariak, eta Azpiroz, Muruaga, Arruti, Nazabal eta Zabala izan ziren Txost taldekoak.
Bost taldek hartu dute parte aurtengo txapelketan, hiru lapurtarrek eta bi gipuzkoarrek: Kanboarrak (Kanbo, Lapurdi), Kapito Harri (Uztaritze, Lapurdi), Luzean (Donibane Lohitzune, Lapurdi), Txost (Oiartzun) eta Zubieta. Txapelketako partidak Oiartzungo, Villabonako eta Zubietako plazetan jokatu dira.
Txostek Uztaritzeko Kapito Harriren aurkako finalerdia garaituz lortu zuten finalerako sailkapena, 3-13 markagailuarekin. Enrique Abril pelotari vilabonatarraren omenez antolatzen den errebote txapelketan inoiz lortutako emaitzik onena du aurten oiartzungo taldeak, lehenengo aldia baitzen finalera iristea lortzen zutela. Oiartzuarrentzat, hala ere, bigarrena izango da, Oiarpe taldeak finala jokatu baitzuen 2009. urtean. Final hura, Kapito Harriren aurka galdu zuten.
Luzeanek sailkapenerako ligaxka irabazita, finalerako zuzeneko txartela lortu zuen. Lapurtarrek emaitza ezinhobeak lortu izan dituzte Enrique Abril Txapelketan. Izan ere, 32. finala zuten aurtengoa, azken lau txapelketakoak jarraian, eta horietatik hogeita bat alditan jantzi dute txapela, eta beste hamaikatan txapeldunorde izan dira.
Txantxangorri aldizkaria etxean jaso nahi baduzu, erreportajeak online argitaratu aurretik, egin zaitez harpidedun hemen.
|
Erreportajea gustatu bazaizu, jarrai iezaguzu sareetan (X, Facebook eta Instagram) gure edukiez gozatzeko. Gainera, proposamen edo iradokizunen bat helarazi nahi badiguzu, txantxangorri@txantxangorri.info helbidera idatz diezagukezu. |
