Muga jardunaldiak antolatu dira Gipuzkoaren 1.000 urteak ospatzeko
Euskara, emakumeak, historia edota sagarrak izango dira Gipuzkoako milurtekorako Muga jardunaldiak landuko dituen gaiak
Hamar mende bete dira Ipuzkoako Gaila Andereak eta Garcia Azenariz senar-emazteek egungo Altzoko parte den Olazabaldo Salbatore monastegia doaintzan eman zutela. Beraiek jakin gabe, dokumentu horretan aipatzen da Gipuzkoa lehenengoz, ‘Ipuzkoa’. Milurtekoa ospatzeko Muga jardunaldiak (Mila Urtez Gipuzkoa Altzo) antolatu dira Altzon, bost gairen inguruko bina hitzaldirekin.
Hitzaldi guztiak larunbatetan izango dira Batzarremuñoko aretoan, goizeko 10:00etatik 13:30era. Hitzaldi bakoitzak ordubete inguruko iraupena izango du eta amaieran mahai-ingurua egingo da.
Otsailaren 15ean, XI. mendeko testuinguru sozio-politikoari buruz hitz egingo du Josu Narbarte Hernandez arkeologoak, eta jarraian, ‘Erakundetzea historian zehar’ hitzaldia eskainiko du Gaizka Aranguren Urrotz kazetari eta Euskal Herriaren historian adituak. Amaitzeko, biek Haritz Azurmendik gidatutako ‘Etorkizunean, estatus berria?’ izenburuko mahai-inguruan parte hartuko dute.
Otsailaren 22an, ‘AltzotiK Altzora. Ibilbide historikoa’ hitzaldia eskainiko du David Zapirain Karrika historialariak. Jarraian Mikel Gorrotxategi Nieto Euskaltzaindiako Onomastika zerbitzuko arduradunak eta Manu Olano Jauregi irakasle eta alkate ohiak ‘Altzoko baserriak, bizimoduak eta beste’ hitzaldia eskainiko dute. Ondoren, ‘Altzo bihar’ mahai-igurua gidatuko du Agustin Amiano Gurrutxaga irakasleak eta alkate ohiak.
Martxoaren 15ean, Agurtzane Paz Moro historialariak ‘Erdi Aroko emakumeak. Estereotipoak baztertzen’ hitzaldia eskainiko du. Ondoren, ‘Euskal Herriko emakumearen eraikuntza historian: irakurketa dekolonial bat’ hitzaldia eskainiko du Cira Crespo Cabillo historialariak eta idazleak. Bukatzeko, bi historialariek ‘Emakumearen irudia zimenduetatik eraberritzea’ mahai-inguruan parte hartuko dute Lorea Agirre Dorronsororen gidaritzapean.
Martxoaren 22an, ‘Sagardogintzaren garrantzia gure historian’ hitzaldia eskainiko du Xabier Alberdi Lonbide historialariak eta Albaola elkarteko ikerketa zuzendariak, eta ondoren, ‘Baserriak eta sagardogintza, Altzon’ gaiari buruzko hitzaldia eskainiko du Lurdes Odriozola Oiarbide historialariak. Jarraian ‘Sagardogintza etorkizunean’ gaiari buruzko mahai-ingurua egingo da Feliz San Sebastian sagastizalearen gidaritzapean, Unai Agirre Goia Euskal Sagardoa jatorri deiturako koordinatzailarekin, Olatz Mitxelena Garmendia Gipuzkoako Sagardogile elkarteko koordinatzailearein eta Maite Retolaza Ojanguren Oiharte sagardotegiko nagusiarekin.
Azken hitzaldia martxoaren 29an izango da. Lehenengo EneKO Zuloaga San Romanek ‘Instituzioen eta herritarren arteko harreman-hizkuntza XIX. mendera bitartean’ hitzaldia eskainiko du, eta jarraian Iñigo Urrutia Libarenak ‘Euskararen estatu juridikoa XIX. eta XX. mendeetako trantsizioetan’ hitzaldia eskainiko du. Bukatzeko, Kike Amonarrizek gidatua ‘Euskara, irabazteko bidean?’ mahai-ingurua egingo da Iñigo Urrutia, Nekane San Miguel Bergaretxe epaile-ohia eta Idurre Eskisabel Larrañaga Euskalgintza kontseiluko idazkari nagusiarekin.
Txantxangorri aldizkaria etxean jaso nahi baduzu, erreportajeak online argitaratu aurretik, egin zaitez harpidedun hemen.
|
Erreportajea gustatu bazaizu, jarrai iezaguzu sareetan (X, Facebook eta Instagram) gure edukiez gozatzeko. Gainera, proposamen edo iradokizunen bat helarazi nahi badiguzu, txantxangorri@txantxangorri.info helbidera idatz diezagukezu. |
